Pedagogët e universiteteve publike kanë nisur marshimin drejt Kuvendit të Shqipërisë, duke iu bashkuar protestës kundër qeverisë së kryeministrit Edi Rama. Ata janë grumbulluar fillimisht përpara Korpusit Qendror të Universitetit Politeknik të Tiranës, nga ku kanë nisur lëvizjen në mbështetje të studentëve.
Me pankarta në duar, pedagogët kanë shprehur solidaritetin me të rinjtë, të cilët prej dhjetë ditësh protestojnë kundër qeverisë. “Mos prekni studentët”, “Studentët nuk janë vetëm” dhe “Kur goditet studenti, goditet e ardhmja” janë disa nga mesazhet e tyre.
Një ditë më parë, pedagogët njoftuan bojkotimin e procesit mësimor në universitetet publike, duke bërë të ditur se ky vendim do të mbetet në fuqi deri në një njoftim të dytë.
Protesta e pedagogëve zhvillohet paralelisht me tubimin e studentëve përpara Kuvendit, ku këtë të enjte po mbahet seanca plenare. Përveç mbështetjes për studentët, pedagogët kanë kërkuar edhe dorëheqjen e kryeministrit Edi Rama.
Mbetet për t'u parë nëse protesta do të zhvillohet paqësisht apo nëse do të shoqërohet me tensione dhe përplasje me forcat e policisë, siç ka ndodhur gjatë ditëve të fundit.
