Mark Gjonaj i është drejtuar me një letër kryeministrit Edi Rama, duke dënuar dhunën e policisë ndaj studentëve dhe të rinjve që protestojnë prej nëntë ditësh në Shqipëri. Ai kërkon hetim të pavarur të rasteve të dhunës dhe vënien përpara përgjegjësisë të personave të përfshirë.
“Asnjë fitore politike nuk vlen sa jeta e një shqiptari”, shprehet Gjonaj, duke theksuar se dhuna ndaj protestuesve është e papranueshme dhe nuk mund të justifikohet nga asnjë interes politik.
Në shenjë proteste, Gjonaj ka njoftuar dorëheqjen e menjëhershme nga Këshilli i Diasporës, ndërsa në letrën drejtuar Ramës kërkon edhe krijimin e një qeverie tranzitore dhe ndërmarrjen e reformave demokratike.
Sipas tij, ndryshimi i udhëheqjes politike është i domosdoshëm për të dalë nga situata aktuale, ndërsa protestat e të rinjve kanë rikthyer në qendër të debatit përdorimin e forcës nga policia dhe respektimin e të drejtës për protestë paqësore.
Mark Gjonaj është një politikan dhe aktivist shqiptaro-amerikan, i njohur për angazhimin e tij në mbështetje të komunitetit shqiptar në Shtetet e Bashkuara. Ai ka shërbyer si anëtar i Asamblesë së Shtetit të Nju Jorkut dhe më pas si këshilltar në Këshillin Bashkiak të Nju Jorkut, duke qenë një nga përfaqësuesit më të njohur të diasporës shqiptare në politikën amerikane.
