Një ditë pasi studentët refuzuan ftesën për dialog, Edi Rama ka nxjerrë sërish karriget në shkallët e Kryeministrisë. Ndryshimi i vetëm i dukshëm është ngjyra e tyre: dje të kuqe, sot të zeza. Ndërsa mënyra se si kryeministri po i qaset protestës mbetet e njëjtë.
Edhe këtë mëngjes, Rama përsëriti ftesën për dialog, duke deklaruar se e drejta për të protestuar është e pamohueshme, por se asnjë pakënaqësi nuk mund të justifikojë dhunën.
“Dje dialogu mori përgjigjen e dhunës, sot dialogu është këtu përsëri, dora ime është e shtrirë për ata që mendojnë ndryshe nga unë”, deklaroi kryeministri.
Megjithatë, edhe këtë herë ftesa u shoqërua me paralajmërime për protestuesit. Rama tha se kush ka ushtruar dhunë apo ka dëmtuar pronën publike dhe private do të përballet me pasoja ligjore dhe financiare, duke theksuar se përgjigjja e institucioneve nuk do të vonojë.
Qëndrimi i kryeministrit vjen pas shtatë ditësh protestash të shoqëruara me përplasje, përdorim të gazit lotsjellës dhe plumbave të gomës, arrestime dhe denoncime për dhunë policore.
Ndërsa Rama këmbëngul te distancimi i studentëve nga dhuna dhe përgjegjësia e tyre për incidentet, në deklaratën e sotme nuk pati një qëndrim të posaçëm për pretendimet e dhunës nga policia apo shkeljet e evidentuara nga Avokati i Popullit.
Për të dytën ditë radhazi, Kryeministria ofron të njëjtën skenë dialogu, këtë herë me karrige të zeza. Studentët, të cilët e refuzuan dje ftesën, nuk kanë dhënë ende një përgjigje të re ndaj saj.
