Në Gaza, Izraeli duhet të vrasë çdo natë “30 deri në 40” njerëz dhe duhet të ndërtojë vendbanime hebraike në territorin palestinez, ka deklaruar ministri i Sigurisë Kombëtare i ekstremit të djathtë të vendit në një intervistë.
Itamar Ben-Gvir, një kolon hebre i linjës së ashpër, i dënuar më parë për nxitje të racizmit, i bëri këto komente në një podcast të drejtuar nga Rom Braslavski, i cili u mor peng nga grupi militant palestinez Hamas gjatë sulmit të 7 tetorit 2023 ndaj Izraelit, sulm që shkaktoi luftën në Gaza.
Në intervistë, Ben-Gvir tha se nuk ishte dakord me kufizimin e fundit të operacioneve ushtarake në Gaza nga kryeministri izraelit Benjamin Netanyahu. Ky ndryshim ka ardhur në kuadër të përpjekjeve të zyrtarëve amerikanë për të zbatuar një plan paqeje të prezantuar nga Presidenti Donald Trump vitin e kaluar.
“Mendoj se çdo natë duhet të shënjestrojmë dhe kryejmë 30 deri në 40 vrasje,” tha Ben-Gvir. “Jo vetëm ndaj atyre që përbëjnë një kërcënim të menjëhershëm. Atje ka njerëz që nuk meritojnë të jetojnë… Ata nuk janë as njerëz.”
Ben-Gvir bëri gjithashtu thirrje për rikthimin e vendbanimeve hebraike në territorin palestinez, duke thënë se ai e imagjinonte “të gjithë Gazën” si pjesë të Izraelit dhe përsëriti thirrjet e tij të mëparshme që palestinezët të “emigrojnë”.
“E imagjinoj ndërtimin e vendbanimeve jo vetëm në Gush Katif, por në të gjithë Gazën, si dhe inkurajimin e emigrimit — sa më shumë, aq më mirë,” tha ai, duke iu referuar vendbanimeve që Izraeli i çmontoi në vitin 2005. “Ndërsa për terroristët, nuk duhet të ketë emigrim. Thjesht duhet t’i vrasim një nga një.”
Gjatë sulmit të Hamasit më 7 tetor, sipas zyrtarëve izraelitë, militantët vranë 1,200 njerëz dhe morën më shumë se 250 pengje në Gaza, ku ata u mbajtën në kushte të vështira. Shumë prej tyre kanë deklaruar se pësuan abuzime gjatë kohës në robëri.
Izraeli iu përgjigj me një ofensivë të fuqishme në Gaza, e cila, sipas zyrtarëve palestinezë, ka vrarë më shumë se 73,000 njerëz dhe ka shkaktuar një katastrofë humanitare në territor. Kjo shifër përfshin edhe 1,200 njerëz të vrarë që nga hyrja në fuqi e armëpushimit në tetorin e kaluar.
Ashpërsia e ofensivës ka shkaktuar kritika të forta ndërkombëtare. Gjatë dy viteve të fundit, një numër në rritje grupesh — nga një komision i OKB-së deri te organizatat e të drejtave të njeriut dhe studiuesit e gjenocidit — kanë akuzuar Izraelin për kryerjen e gjenocidit ndaj palestinezëve në Gaza. Izraeli i ka mohuar me forcë akuzat për gjenocid dhe ka insistuar se vepron në përputhje me të drejtën ndërkombëtare.
Deklaratat e Ben-Gvir janë më të fundit të një serie deklaratash nxitëse nga ministri i ekstremit të djathtë, i cili mbikëqyr policinë në sistemin e burgjeve të Izraelit. Ai më parë është mburrur se i ka bërë më të ashpra kushtet në burgjet izraelite, ku ka pasur raportime të shumta për abuzime ndaj të burgosurve palestinezë.
Gjithashtu, partia e tij, Jewish Power (Fuqia Hebraike), udhëhoqi përpjekjet për miratimin e një ligji të debatueshëm që vendos dënimin me vdekje për palestinezët e dënuar për vrasjen e izraelitëve në akte terroriste, por jo për izraelitët hebrenj që vrasin palestinezë në rrethana të ngjashme.
Gjatë intervistës, Braslavski, i cili ishte një nga pengjet e fundit të liruar nga Hamasi në tetor 2025, kërkoi që t’i lejohej të ekzekutonte personat e dënuar me vdekje për akuza terrorizmi. Ben-Gvir tha se do të bënte gjithçka që mundej për të përmbushur kërkesën e Braslavskit.
