Një shtetas shqiptar 85-vjeçar ka ndërruar jetë në aeroportin “Guglielmo Marconi” të Bolonjës, pasi pësoi një arrest kardiocirkulator gjatë fazës së uljes së avionit me të cilin po udhëtonte nga Tirana.
Ngjarja ndodhi natën mes 15 dhe 16 gushtit. Sipas Rai News Emilia-Romagna, i moshuari po udhëtonte me një fluturim Ryanair nga Tirana drejt Bolonjës, i cili u ul pak pas mesnatës.
85-vjeçari udhëtonte së bashku me disa familjarë dhe, sipas raportimeve italiane, vuante prej kohësh nga probleme serioze shëndetësore. Për këtë arsye, për të ishte kërkuar paraprakisht edhe asistencë mjekësore në momentin e zbritjes nga avioni.
Por gjatë fazës së uljes gjendja e tij u përkeqësua papritur. Sipas të dhënave të para, shqiptari pësoi një arrest kardiocirkulator.
Pas uljes së avionit në aeroportin e Bolonjës u aktivizua menjëherë personeli mjekësor, por pavarësisht përpjekjeve për ta mbajtur në jetë, 85-vjeçari nuk arriti të mbijetonte. Vdekja e tij u konstatua rreth orës 01:00.
Mediat italiane raportojnë se bëhet fjalë për një vdekje të shkaktuar nga një problem akut kardiak dhe, deri në këtë fazë, nuk ka të dhëna që ngjarja të lidhet me ndonjë problem teknik të avionit apo me vetë fluturimin.
