I dërguari i presidentit amerikan Donald Trump për Lindjen e Mesme, Jared Kushner, është takuar me kryeministrin izraelit Benjamin Netanyahu, në kuadër të përpjekjeve për të çuar përpara planin e paqes të mbështetur nga Shtetet e Bashkuara për Rripin e Gazës.
Kushner mbërriti në Izrael të dielën në mbrëmje, pas bisedimeve të rralla me përfaqësues të Hamasit lidhur me zbatimin e planit amerikan. Vizita vjen pasi Izraeli kundërshtoi javën e kaluar planin 15-pikësh të Trumpit, i cili parashikon ndër të tjera tërheqjen graduale të trupave izraelite dhe rindërtimin e Gazës nën një administratë të re civile palestineze.
Pika më e debatueshme mbetet çarmatimi i Hamasit. Grupi palestinez është shprehur i gatshëm të heqë dorë nga armët në këmbim të një tërheqjeje graduale të forcave izraelite, ndërsa qeveria e Netanyahut kërkon që çarmatimi të përfundojë përpara çdo tërheqjeje.
Izraeli kërkon gjithashtu që armët e dorëzuara nga Hamasi të shkatërrohen dhe jo të ruhen nga një komitet teknokratik palestinez, duke argumentuar se në të kundërt ato mund të rikthehen në duart e grupit.
Ndërkohë, sipas mediave izraelite, të dërguarit e Bordit të Paqes, Nickolay Mladenov dhe Tony Blair, pritet të takohen gjithashtu me Netanyahun për të diskutuar mënyrat e zbatimit të planit amerikan.
Përpjekjet diplomatike zhvillohen në një klimë të tensionuar politike në Izrael, ku Netanyahu po përballet me presion të shtuar nga aleatët e tij të ekstremit të djathtë, të cilët kërkojnë një qasje edhe më të ashpër në Gaza.
Ministri i Sigurisë Kombëtare, Itamar Ben-Gvir, ka bërë thirrje për eliminime të përditshme të personave në Gaza, duke përdorur edhe deklarata të ashpra dhe çnjerëzuese ndaj palestinezëve. Qëndrimet e tij bien ndesh me përpjekjet e administratës Trump për të avancuar një marrëveshje që do t’i jepte fund konfliktit dhe do të hapte rrugën për një fazë të re politike në Gaza.
