Dëshmia e ish-ministrit Ilir Beqaj në Komisionin Hetimor për koncesionet në shëndetësi ka dështuar sot, pasi seanca u mbyll pa arritur një rezultat konkret. Nënkryetari i Komisionit, Plarent Ndreca, propozoi ndërprerjen e seancës duke deklaruar se "sot nuk po i japim dot drejtim".
Seanca e pyetjeve për ish-ministrin Beqaj do të vazhdojë nesër, në orën 10:30. Kryetarja e Komisionit, Albana Vokshi, bëri të ditur se procesi do të rifillojë nesër me të njëjtin rend dite.
Në seancën e sotme, dëshmia e Ilir Beqajt u mbajt peng për disa orë për shkak të mosdakordësisë mes deputetëve të PS-së dhe PD-së mbi procedurën që duhej të ndiqej. Kërkesa e Beqajt për të shoqëruar deklaratën e tij me pamje vizuale (foto dhe video) për të mbrojtur vendimin e tij për koncesionimin e procesit të sterilizimit të pajisjeve kirurgjikale në spitalet publike u bë shkak për përplasje mes anëtarëve të komisionit.
Ilir Beqaj mbërriti në Kuvend i shoqëruar nga policia dhe me pranga në duar. Pas uljes në vendin e dëshmitarit, ai kërkoi që deklarata e tij të mbështetet me materiale vizuale, duke shkaktuar kështu një ngërç në Komision.
