Ish-ministri i Shëndetësisë, Ilir Beqaj, u paraqit sot në Komisionin Hetimor për Shërbimet Publike të Sterilizimit dhe Check-Up-it në Shëndetësi. Beqaj dëshmoi në lidhje me rolin e tij gjatë dhënies së koncesionit për sterilizimin, çështje e cila është bërë objekt i hetimeve intensive.
Ilir Beqaj ndodhet në qeli, i akuzuar për shpërdorim të fondeve të SASPAC, ndërsa ndaj tij është vendosur masa “detyrim paraqitje” për çështjen e koncesionit të Sterilizimit.
Një ditë më parë, para Komisionit dëshmoi edhe biznesmeni Ilir Rrapaj, i cili gjithashtu është arrestuar në lidhje me skandalin e koncesionit të Sterilizimit. Komisioni ka vijuar thirrjen e dëshmitarëve, duke ndjekur procedurat ligjore të parashikuara në Kodin e Procedurës Penale.
Dëgjimi i Beqajt ishte parashikuar të fillonte në orën 10:00 të mëngjesit, për të sqaruar rrethanat që lidhen me çështjen dhe rolin e tij në këtë aferë të shumëdiskutuar.
