Me pranga në duar dhe i rrethuar nga forcat e policisë, biznesmeni Ilir Rrapaj ka mbërritur sot në Komisionin Hetimor Parlamentar për Shërbimet Publike të Sterilizimit dhe Check-up-it në Shëndetësi. Seanca e Komisionit nisi në orën 09:30 dhe është pjesë e hetimeve intensive për të sqaruar çështjen e koncesionit të sterilizimit.
Komisioni po vazhdon me marrjen në pyetje të një sërë dëshmitarësh të rëndësishëm, ndër ta edhe Rrapaj, i cili së bashku me ortakun e tij italian, Umbro Staccini, është një nga partnerët kryesorë të kompanisë “SaniService”. Kjo kompani fitoi në vitin 2015 koncesionin e sterilizimit, një kontratë me vlerë prej 100 milionë eurosh. Dëshmitarët e tjerë të thirrur për të dëshmuar janë ministrja Anila Denaj, Altin Fani, Elisabetta Anzanello dhe Giorgio Tardioli.
Hetimi ka për qëllim të hedhë dritë mbi procedurat dhe rrethanat që çuan në përzgjedhjen e këtij koncesioni të debatueshëm, duke përfshirë edhe implikimet e mundshme të figurave kyçe të përfshira në projekt.
