SPAK kërkoi shpalljen fajtor të ish-kryetarit të bashkisë së Durrësit, Vangjush Dako, dhe dënimin e tij me 4 vite burg. Për shkak të gjykimit të shkurtuar, dënimi i reduktohet në 2 vite e 8 muaj. Ish-kryebashkiaku, i cili u përgjua në biseda me anëtarë të grupit kriminal Avdylaj në Shijak, akuzohet për shpërdorim detyre në dy raste. Në rastin e parë, lidhur me një pallat të dëmtuar nga tërmeti i 26 nëntorit 2019, ku sipas SPAK, leja për pallatin u lëshua me 2 vite vonesë, duke i hapur rrugën legalizimit. Në rastin e dytë, për projektin e Promenadës për rehabilitimin e vijës bregdetare, ku pavarësisht gabimeve të evidentuara në projekt nga KLSH, Dako ka vijuar kryerjen e pagesave, duke i shkaktuar dëm buxhetit. Dako nuk ishte i pranishëm në procesin gjyqësor dhe aktualisht ndodhet në arrest shtëpiak. Ai është shpallur gjithashtu “non grata” nga SHBA.
Për tre të pandehurit e tjerë, Fiqiri Farruku, Fatmir Ejupi dhe Ardian Bulku, SPAK kërkoi dënimin e tyre me 2 vite burgim, por me pezullimin e ekzekutimit për shkak të arsyeve shëndetësore dhe familjare. Të tre akuzohen për falsifikim dokumentesh.
