Ish-ministri Ilir Beqaj kërkoi nga komisioni parlamentar të përcaktohej një kornizë ligjore për atë që mund të thoshte, në mënyrë që deklaratat e tij të mos përdoren kundër tij në proceset penale. Gjithashtu, ai kërkoi që dëshmia e tij të trajtohej ndryshe nga ajo e dëshmitarëve të tjerë. Kërkesa u kundërshtua nga kryetarja e komisionit, Albana Vokshi, e cila deklaroi se Beqaj nuk ka privilegje të veçanta dhe nuk është më i mirë se dëshmitarët e tjerë.
Përplasja vijoi kur Ndreca, theksoi se Beqaj ka të drejtë të japë deklaratën e tij siç e mendon ai dhe se çdo kufizim i imponuar do të ishte një shkelje e të drejtave të dëshmitarëve. Vokshi u përgjigj se çdo procedurë është ndjekur siç duhet dhe se ajo garanton zbatimin e ligjit.
Kujtojmë se Beqaj akuzohet për shpërdorim detyre lidhur me kontratën 10-vjeçare të sterilizimit të pajisjeve kirurgjikale, një proces që SPAK e konsideron të mbushur me shkelje të rënda.
Debati
Beqaj: Dua të parashtroj dy kërkesa. Në statusin juridik që kam, është që gjykata mund t’ju japë një kornizë të
asaj që mund të them, që mos të më përdoret kundër meje nesër në proceset penale.
Vokshi: Kemi ndjekur procedurat për të marrë leje për dëshminë. Kushtetuesja ka përcaktuar se hetimi parlamentar nuk ka asnjë mbivendosje ndaj një hetimi penal. Duke ju siguruar që kemi ndërmarrë hapat e duhura me konsensusin e plotë të anëtarëve do ju ftoja të vijojmë me deklaratën mbi objektin e dëshmisë.
Ndreca: Ne nuk kemi kufizim nga dokumentacioni i ardhur nga SPAK.
