Komisioni Hetimor për Koncesionet në Shëndetësi ka vazhduar me tensione, ku diskutimet mes kryetares Albana Vokshi dhe deputetit Plarent Ndreca shpërthyen në akuza dhe fyerje të ndërsjella.
Debatet po zhvillohen lidhur me dëshminë e Ilir Beqajt, ish-ministër i Shëndetësisë, i cili prej disa orësh ndodhet në Kryesinë e Kuvendit, në pritje të dakordësisë mes anëtarëve të Komisionit, për të dhënë dëshminë e tij.
Vokshi akuzoi Ndrecën se po përdor komisionin për të pastruar çështje personale, duke i thënë se “po mendon për hallet e tua, i ke më të mëdha se Ilir Beqaj.” Ajo vazhdoi duke thënë se “ke ato hallet e tua dhe kujton se po i zgjidh këtu. Nga kapelet, te administratorët, e deri tek tjetërimi i pronave, e më tej.”
Në përgjigje, Ndreca e quajti Vokshin “bolshevike” dhe e akuzoi për mungesë argumentash, duke thënë se “nuk të llogaris fare”. Ai shtoi se “njihesh vetëm me Sali Berishën dhe qytetarët i pështyn”.
Debati:
Vokshi: Zoti Plarent Ndreca unë uroj që ti të fitosh ca pikë sot
Ndreca: Nuk më duhen pikët, më duhet e vërteta
Vokshi: Uroj të shpëtosh nga ca hallet e tua që nuk ti zgjidh ky komision!
Ndreca: Nuk të pres ty të bësh këto analiza, lëri këto intimidime se nuk të ecin.
Vokshi: Këto hallet personale që ke jo më pak se Ilir Beqaj, dhe ca të tjera që po të vijnë. Se po të ishte ti me integritet do thoje që nuk rri dot këtu.
Ndreca: Partia jote është hedhur në sulm. Ju doni që unë të mos flas. Ti nuk mbron dot veten tëndë jo mua. Je bërë qesharake
Vokshi: Ti ke ato hallet e tua dhe kujton se po i zgjidh këtu. Duke filluar nga kapelet, duke vazhduar edhe nga administratorët, te tjetërimi i pronave e duke vazhduar me të tjerat.
Ndreca: Kapet hajde se të kam thirrur në gjykatë, pse i shmangesh? Hajde në gjykatë se të kam ftuar.
Vokshi: Nuk ta zgjidh dot kapalen unë
Ndreca: Merresh me mua dhe jo me argumentin se je bolshevike. Ti je një formë Gestapo
Vokshi: Unë vij nga PD
Ndreca: Mund të vish nga PD, por ka bolshevikë sa të duash atje dhe një nga ata je ti.
