Për herë të parë, Drejtori i Përgjithshëm i Policisë së Shtetit, Ilir Proda, mbajti një qëndrim për masakrën me 4 të vrarë në Dobraç të Shkodrës. Proda u shfaq më shumë si një qytetar i lënduar sesa si kryepolic me detyrën për të parandaluar ngjarje kriminale dhe për të identifikuar e çuar para drejtësisë autorët e këtij ekzekutimi mafioz. Sot, më shumë se kurrë, duket se fokusi i tij është emërimi i disa drejtorëve në qarqe, sesa angazhimi i plotë me strukturat për të parandaluar që njerëz të pafajshëm të vriten në rrugë, siç po ndodh fatkeqësisht.
“Unë jam qytetar vetë dhe e vlerësoj shqetësimin tuaj qytetar. Nuk diskutohet që ne kemi vepruar. Grupi i posaçëm duket sikur nuk po punon, por unë me garanci po ju them se shumë shpejt do të kemi rezultate për atë ngjarje. Ngjarja ishte e rëndë; sikur të kisha një shkop magjik për të kthyer kohën pas, besoj se të gjithë do të kishim bërë gjithçka që të mos ndodhte, por ja që ka ndodhur. Është fakt tani dhe duhet të përballemi me të. Nuk ka pasur vetëm në Shkodër ngjarje të tilla; situatë problematike ka pasur edhe në qytete të tjera të Shqipërisë që i kemi adresuar,” deklaroi Proda.
Proda nuk arriti të artikulonte as gjysmën e një fjale për dështimin e policisë në parandalimin e ngjarjes, ndonëse një nga viktimat, Arlind Bushati, kishte denoncuar përpara se të vritej se ndodhej në rrezik. Ai nuk dha as shpjegime për vonesën prej 40 minutash të policisë për të mbërritur në vendngjarje dhe për faktin që një person misterioz u largua nga vendi i krimit pa dhënë as dëshminë më të vogël. Nuk mbajti asnjë përgjegjësi, siç pritet nga çdo funksionar në një vend normal. Ai vetëm përmendi "shkopin magjik" dhe premtoi rezultate.
