Agjencia e Mbikëqyrjes Policore (AMP) ka referuar në Prokurorinë e Shkodrës disa efektivë të forcave Shqiponja, nën dyshimet për shpërdorim detyre në lidhje me masakrën e Dobracit, ku u regjistruan katër viktima. Sipas AMP-së, nga të dhënat mediatike rezulton se forcat Shqiponja nuk kanë siguruar vendin e ngjarjes dhe nuk kanë shoqëruar për t’i pyetur personat e pranishëm.
Në Dobraç, gjatë një atentati të organizuar, u ekzekutua Hamza Lici, vëllai i të shumëkërkuarit Ibrahim Lici. Arlind Bushati mbeti i plagosur, por humbi jetën më vonë në spital.
Nga ngjarja mbetën viktima edhe Flutura Basha dhe bashkëshorti i saj, Bashkim Basha.
Dyshohet se në automjetin ku ndodheshin viktimat mund të ketë qenë edhe një person i tretë, me dyshime të orientuara drejt Ibrahim Licit, i cili ende nuk është identifikuar.
