Një ngjarje tragjike ka ndodhur të martën në një fshat të Librazhdit, ku një grua e moshuar ka humbur jetën pas një incidenti të pazakontë. Ndërsa ishte duke kullotur tufën e saj të bagëtive, ajo është goditur nga dashi i kopesë, duke e rrëzuar dhe përplasur në tokë.
Goditja fatale ka qenë e rëndë për të moshuarën, rreth 75 vjeç, e cila humbi jetën në vend nga plagët. Ngjarja u zhvillua në fshatin Dragostunjë, Njësia Administrative Qendër, Bashkia Librazhd. Gruaja u gjet nga një fqinje e saj, që ishte gjithashtu një e afërme.
E ndjera jetonte e vetme dhe kujdesej për një tufë të vogël bagëtish. Fëmijët e saj, që jetojnë në Tiranë dhe jashtë vendit, e kishin këshilluar të shpërngulej me ta, por ajo kishte zgjedhur të qëndronte në fshat pas humbjes së bashkëshortit të saj.
