Partia Demokratike ka thirrur sot mbështetësit e saj të mblidhen në Rinas për të pritur Sali Berishën, pas kthimit të tij nga Shtetet e Bashkuara të Amerikës.
Kreu i PD-së qëndroi për disa ditë në SHBA, ku zhvilloi takime me përfaqësues të diasporës shqiptare dhe me kongresmenë republikanë amerikanë. Selia blu e ka paraqitur vizitën si një moment të rëndësishëm politik, duke e lexuar si një rikthim të Berishës në skenën amerikane dhe si sinjal force për opozitën.
Por thirrja për pritje në aeroport hap edhe një dilemë më të madhe për demokratët: a është energjia politike e opozitës për t’u kthyer në alternativë qeverisëse, apo për t’u organizuar rreth ritualeve të besnikërisë ndaj liderit?
Në një kohë kur vendi ka kriza të hapura, nga korrupsioni te drejtësia, ekonomia, pronat dhe kapja e institucioneve, PD duhet të bindë qytetarët se është gati për pushtet. Për këtë nuk mjafton një pritje në Rinas, as fotografia e një turi amerikan. Opozita duhet të tregojë se ka program, ekip, vizion dhe fuqi për të prodhuar shumicë politike.
Sali Berisha rikthehet sot në Tiranë me entuziazmin e selisë blu pas vizitës në SHBA. Sfida e vërtetë, megjithatë, nuk është sa demokratë do ta presin në aeroport, por nëse PD mund të dalë përtej pritjes së “Doktorit” dhe të kthehet në alternativë reale për të ardhur në pushtet.
