Drejtori i Përgjithshëm i Policisë së Shtetit, Ilir Proda, ka kërkuar rritje të fondeve për Policinë e Shtetit gjatë një raportimi para Komisionit Parlamentar të Sigurisë Kombëtare lidhur me buxhetin e vitit të ardhshëm. Proda theksoi se është e domosdoshme që Policia të ketë automjetet e veta, duke argumentuar se përdorimi i automjeteve me qira po krijon një barrë të rëndë financiare.
“Automjetet me qira kanë një kosto shumë të madhe. Dhe një pjesë e madhe janë amortizuar. Do ishte më mirë të kishim mjetet tona. Na duhen rreth 700 automjete,” deklaroi Proda.
Kryepolici shtoi se aktualisht 50% e flotës së automjeteve të Policisë është e amortizuar, duke bërë të nevojshme blerjen e makinave të reja për të shmangur shpenzimet e mëdha që vijnë nga makinat me qira. “Duhet parë me prioritet shtesa për investimin e automjeteve që duhen blerë. Kemi kosto të mëdha me makinat me qira,” përfundoi ai.
