Pronari i Gucci-t, Kering, njoftoi të dielën se ka rënë dakord të shesë biznesin e tij të bukurisë te gjiganti francez i kozmetikës L'Oréal për 4 miliardë euro (4.66 miliardë dollarë), ndërsa CEO-ja i ri Luca de Meo ndërmerr hapa për të ulur borxhin e lartë të grupit të luksit dhe për të riorientuar fokusin drejt biznesit kryesor të modës.
Sipas marrëveshjes, L'Oréal do të blejë markën e parfumeve Creed, si dhe të drejtat për të zhvilluar produkte parfumerie dhe bukurie nën markat e modës të Kering-ut: Gucci, Bottega Veneta dhe Balenciaga, përmes një licence ekskluzive 50-vjeçare. Licenca aktuale për parfumerinë Gucci mbahet nga Coty, dhe marrëveshja e re do të hyjë në fuqi pasi të skadojë ajo ekzistuesja — që sipas analistëve pritet të ndodhë në vitin 2028.
Kjo shitje përbën një hap të rëndësishëm për të ulur borxhin neto të Kering, i cili në fund të qershorit arriti në 9.5 miliardë euro, pa përfshirë edhe 6 miliardë euro në detyrime nga qiratë afatgjata — një çështje që ka shqetësuar investitorët.
Kompania ka pasur vështirësi në rritjen e markës së saj më të madhe, Gucci, e cila është prekur rëndë nga rënia e kërkesës në tregun kyç kinez.
Vetëm dy muaj pasi mori drejtimin, de Meo po zhbën një nga ndryshimet më të mëdha strategjike të paraardhësit të tij Francois-Henri Pinault, familja e të cilit kontrollon grupin. Kering krijoi njësinë e bukurisë në vitin 2023, pas blerjes së prodhuesit të parfumeve Creed për 3.5 miliardë euro, me qëllimin për të diversifikuar dhe për të ulur varësinë nga marka Gucci, që siguron pjesën më të madhe të fitimeve të grupit. Megjithatë, njësia e bukurisë ka pasur vështirësi të rritet, duke regjistruar një humbje operacionale prej 60 milionë eurosh në gjysmën e parë të vitit.
Ndërkohë, të ardhurat nga Gucci ranë me 25% krahasuar me vitin e kaluar në tremujorin e fundit të raportuar, duke rritur presionin mbi Kering për të ulur borxhin dhe për të shmangur ulje të mëtejshme të vlerësimit të kreditit.
De Meo, i cili mori postin e CEO-së në shtator, i kishte paralajmëruar aksionarët se do të merrte disa vendime të vështira për të ulur borxhin e grupit, përfshirë racionalizimin dhe riorganizimin, kur të jetë e nevojshme.
L'Oréal, si kompania më e madhe në botë në fushën e kozmetikës dhe bukurisë, prodhon tashmë parfume të njohura nën markën Yves Saint Laurent, pasi bleu të drejtat për këtë markë nga Kering për 1.15 miliardë euro në vitin 2008.
Marrëveshja për blerjen e njësisë së bukurisë nga Kering do të jetë më e madhja e bërë ndonjëherë nga L’Oréal — më e madhe se blerja e markës australiane Aesop për 2.5 miliardë dollarë në vitin 2023.
L’Oréal, që ka pohuar se ka "shumë" blerje potenciale në shqyrtim këtë vit, është kontaktuar gjithashtu nga përfaqësues të Grupit Armani, raportoi Reuters këtë muaj, pasi konglomerati i bukurisë u përmend në testamentin e stilistit të ndjerë Giorgio Armani si një nga blerësit e preferuar për një pjesë të aksioneve të shtëpisë së tij të modës.
