Në një sallë plot me figura të njohura politike, artistë dhe shumë personazhe të ndryshëm, Fondacioni ‘Fundjavë Ndryshe’ ka festuar 10-vjetorin e krijimit të tij. Nuk ka munguar as kryeministri, që i ka kujtuar Arber Hajdarit se ka qenë anëtar i FRESSH socialist.
Arbër, Fundjava Ndryshe është një palestër e shpresës dhe trajner i disiplinës — tha Edi Rama, që në fakt harroi të thoshte se Arbrit dhe bamirësisë së tij, që furnizohet nga paratë e shqiptarëve, i ka dorëzuar së fundmi edhe disa dhjetëra hektarë tokë në fshatin Ferraj, që gojët e liga thonë se janë tokë pronarësh që komunistët ia kanë marrë me reformën agrare. Vetë Arber Hajdari, që diku shfaqet si bamirës e diku si opinionist i Big Brother, nuk i ka fshehur ambiciet për politikë; duket se me këtë rast ka gjetur edhe shembullin më të mirë. Epo, dardha nën dardhë bie… apo duhet thënë kush ha dardha dhe kumbulla pas shpinës së shefit e ha SPAKU?
