Një libër i ri mbi monarkinë britanike, Power and the Palace, hedh dritë mbi një episod të panjohur të jetës së Mbretëreshës Camilla. Sipas autorit Valentine Low, Camilla ka rrëfyer se në adoleshencë ishte viktimë e një tentative sulmi seksual në një tren, por ia doli të mbrohej duke përdorur takën e këpucës.
Ngjarja u bë publike përmes një bisede që Camilla pati me Boris Johnson, gjatë kohës kur ai ishte kryetar i Londrës (2008–2016). Ish-drejtori i komunikimit të Johnson, Guto Harri, kujtoi takimin në Clarence House, rreth vitit 2008, duke treguar se mbretëresha rrëfeu:
“Isha rreth 16–17 vjeçe, në tren për Paddington, kur një djalë po afrohej me dorën e tij… Unë bëra atë që më kishte mësuar nëna: hoqa këpucën dhe e godita me takë në testikuj.”
Pas incidentit, Camilla arriti të raportojë ngjarjen tek një roje në stacion, duke çuar në arrestimin e agresorit.
Sot, në moshën 78-vjeçare, Mbretëresha Camilla është një zë i fortë kundër dhunës në familje dhe abuzimit seksual. Ajo ka mbështetur shumë nisma për viktimat, përfshirë krijimin e pakove ndihmëse për gratë e dhunuara, një iniciativë që është rikthyer së fundmi.
