Këtë të shtunë, në ditën e 14-të radhazi të mobilizimit qytetar, ka nisur në orën 18:00 protesta kundër kryeministrit Edi Rama dhe qeverisë së tij. Ashtu si në mbrëmjet e mëparshme, qytetarë të shumtë, të shoqëruar nga familjarë dhe fëmijë të mitur, u mblodhën fillimisht në sheshin “Skënderbej”, për të marshuar më pas drejt Kryeministrisë.
Pjesëmarrësit mbanin në duar pankarta, flamuj shqiptarë dhe amerikanë, ndërsa përgjatë marshimit janë dëgjuar thirrje kundër qeverisë dhe klasës politike. Organizatorët kanë bërë thirrje që protesta të mbetet paqësore dhe të shmangen provokimet.
Përpara godinës së Kryeministrisë janë vendosur dhjetëra palë atlete, një simbolikë që sipas organizatorëve përfaqëson largimin e shqiptarëve nga vendi gjatë viteve të fundit. Atletet janë kthyer në një nga imazhet më të forta të protestës së kësaj mbrëmjeje, duke simbolizuar emigrimin dhe boshatisjen e vendit nga të rinjtë.
Ashtu si protestat e mëparshme, edhe tubimi i sotëm pritet të zgjasë për disa orë, ndërsa pjesëmarrësit kërkojnë largimin e Edi Ramës nga pushteti dhe ndryshim të kursit politik në vend.
