Shumë qytetarë, pjesëmarrës ose jo në protestat masive të ditëve të fundit, kanë ngritur pyetjen se kush janë organizatorët e protestës. Në fakt, nuk është shumë e dukshme se cilët janë organizatorët, ndonëse ditët e fundit më të zëshme kanë qenë aktivistja Sidorela Vatnikaj dhe aktivistja e Rrjollit, Luciana Kokaj.
Pa lënë mënjanë edhe Arben Kolën, protestuesin simbol dhe aktivistin që prej 16 vitesh është në zemër të çdo proteste qytetare.
Megjithatë, aktorja Fjoralba Ponari duket se është angazhuar për gjetjen e emrave të personazheve që flasin në protestë. Në një njoftim të publikuar në Instagram, influencerja ka bërë thirrje që të gjithë ata që duan të flasin të kontaktojnë me të, me qëllim përzgjedhjen e personave që do të japin mesazhin e tyre në protestë.
Nuk është e qartë nëse ky rol i marrë përsipër nga Ponari është pjesë e një strukture organizative më të gjerë apo një angazhim individual për të ndihmuar në koordinimin e folësve, por nisma e saj ka tërhequr vëmendjen në rrjetet sociale.
Ndërkohë, protesta hyn sot në ditën e saj të 13-të, duke vijuar mobilizimin e qytetarëve në atë që është kthyer në një nga lëvizjet më të diskutuara të javëve të fundit.
