Protesta hyri sot në ditën e saj të 11-të, duke konfirmuar se lëvizja ka tejkaluar prej kohësh kundërshtimin ndaj projektit në Zvërnec dhe është shndërruar në një shprehje më të gjerë të pakënaqësisë ndaj klasës politike që ka drejtuar vendin në dekadat e fundit. Në shesh u dëgjuan sërish thirrjet “Rama në burg, Berisha në burg”, ndërsa flamujt kombëtarë vijuan të mbizotërojnë mbi çdo simbol partiak.
Risia e ditës ishte se për herë të parë një nga aktivistët artikuloi publikisht nevojën që energjia e protestës të mos mbetet vetëm në shesh, por të organizohet përmes një tryeze të përbashkët. Sipas tij, qytetarët, grupet e interesit, aktivistët dhe përfaqësues të ndryshëm të shoqërisë duhet të ulen së bashku për të diskutuar hapat e mëtejshëm dhe për t’i dhënë protestës një formë më të strukturuar.
Një tjetër element i spikatur ishte debati mbi rolin e forcave politike në protestë. Në shesh u vunë re edhe mbështetës të Partisë Demokratike, ndërsa vijoi përplasja verbale mes atyre që kërkojnë pjesëmarrjen e demokratëve dhe opozitarëve si qytetarë të lirë dhe atyre që këmbëngulin se protesta duhet të mbetet tërësisht jashtë kontrollit të partive politike. Pavarësisht debateve, prania e demokratëve në tubim ishte më e dukshme se në ditët e para.
Ata që morën mikrofonin gjatë mbrëmjes artikuluan gjithnjë e më qartë idenë e një “revolucioni” qytetar dhe të ndërtimit të një “Shqipërie të Re”, duke e paraqitur protestën jo thjesht si kundërshtim ndaj një projekti apo një qeverie, por si përpjekje për ndryshim të thellë politik dhe shoqëror.
Edhe sot folësit ngritën shqetësime për korrupsionin, shpopullimin, kapjen e institucioneve, koston e jetesës dhe mungesën e besimit te partitë tradicionale. Pas 11 ditësh mobilizim, protesta duket se po hyn në një fazë të re, ku krahas revoltës po diskutohen edhe format e organizimit dhe përfaqësimit të saj.
Në përfundim të tubimit, ashtu si çdo mbrëmje gjatë ditëve të fundit, protestuesit marshuan në rrugët e Tiranës, duke e shndërruar ecjen në kryeqytet në një ritual të përditshëm të protestës. Me flamuj kombëtarë dhe thirrje kundër qeverisë e klasës politike, ata përshkuan disa prej akseve kryesore të qytetit, ndërsa organizatorët dhe pjesëmarrësit paralajmëruan vazhdimin e protestave edhe në ditët në vijim.
