Nga koha e duhur për ta përdorur, te efikasiteti i çadrave të plazhit – shkenca sqaron të vërtetat rreth kremit kundër diellit dhe mbrojtjes nga rrezatimi diellor.
Gjatë ditëve të nxehta të verës, kremi kundër diellit është i domosdoshëm për shumicën prej nesh, por rreth tij qarkullojnë shumë mite. Disa prej tyre përhapen nga influencerë të mirëqenies, të tjerë nga burime më zyrtare, ndërsa disa thjesht janë bërë pjesë e perceptimit të zakonshëm.
SPF nuk tregon kohën që mund të rrish në diell
SPF 50 nuk do të thotë që mund të qëndrosh 50 herë më gjatë pa u djegur. Ai tregon përqindjen e rrezeve që depërtojnë në lëkurë: SPF 25 lejon 4% të rrezeve, ndërsa SPF 50 vetëm 2%. Por, këto janë teste laboratorike me sasi më të mëdha kremi sesa përdorin zakonisht njerëzit. Për këtë arsye, ekspertët rekomandojnë rilyerjen çdo dy orë dhe pas notit apo djersitjes.
UVA dhe UVB të dyja janë të rrezikshme
Dikur mendohej se vetëm UVB shkaktonte kancer të lëkurës, por tashmë dihet se edhe UVA dëmton qelizat dhe ndikon në plakjen e lëkurës. Për këtë arsye, dermatologët rekomandojnë përdorimin e kremit me mbrojtje të gjerë spektri.
Mund të digjesh edhe në ditë me re
Retë e holla shpesh nuk bllokojnë rrezatimin UV, madje ndonjëherë mund ta shtojnë. Prandaj, mbrojtja është e nevojshme edhe kur qielli nuk është i pastër.
Hija nuk është gjithmonë mbrojtje e sigurt
Një çadër plazhi ofron vetëm mbrojtje minimale, ekuivalente me SPF 5. Pemët me kurorë të dendur mund të ofrojnë deri në SPF 20, por gjithsesi nuk e eliminojnë rrezikun. Rrezet UV reflektohen gjithashtu nga rëra, uji, betoni dhe xhami.
Jo gjithmonë duhet krem gjatë vitit
Kur indeksi UV është nën 2, siç ndodh në shumë vende gjatë dimrit, rreziku është i ulët. Në këto periudha, kremi nuk është i domosdoshëm për ata që qëndrojnë në ambiente të mbyllura. Por në dëborë apo male, ku rrezatimi rritet ndjeshëm, ai mbetet i nevojshëm.
Kremrat mineralë janë efektivë edhe pa shtresën e bardhë
Pamja nuk ndikon në efikasitet – ata funksionojnë duke absorbuar rrezet UV, jo vetëm duke i reflektuar.
Sunscreen nuk ul vitaminën D
Përdorimi i rregullt i kremit nuk sjell mungesë të vitaminës D, pasi shumica nuk e aplikojnë në sasi të plota dhe trupi gjithsesi merr rrezatim të mjaftueshëm për ta prodhuar.
Mesazhi i ekspertëve është i qartë: mbrojtja nga dielli nuk lidhet vetëm me përdorimin e kremit, por edhe me aplikimin e saktë, rilyerjen e shpeshtë, zgjedhjen e hijes së duhur dhe kujdesin sipas indeksit UV.
