Triliona baktere, kërpudha, viruse dhe organizma njëqelizorë udhëtojnë nëpër atmosferë, duke krijuar një ekosistem të padukshëm, të quajtur aerobiomë, që ndikon si tek moti, ashtu edhe tek shëndeti i njeriut.
Studimet e fundit tregojnë se çdo vit, një trilion trilion qeliza bakteriale dhe rreth 50 milionë tonë spore kërpudhore ngrihen nga toka dhe deti drejt qiellit. Të bartura nga era, zjarret pyjore apo avujt e ujit, këto mikroorganizma mund të udhëtojnë mijëra kilometra përpara se të bien përsëri në tokë.
Në Francë, në malin Puy de Dôme, shkencëtarët kanë zbuluar se çdo milimetër ujë reje përmban deri në 100,000 qeliza të gjalla. Deri më tani, janë identifikuar mbi 28,000 lloje bakteresh dhe 2,600 lloje kërpudhash, shumë prej tyre të panjohura më parë për shkencën.
Ekspertët theksojnë se këto mikrobe nuk janë thjesht pasagjerë të rastësishëm të reve. Ato mund të ndikojnë në mënyrën se si formohen pikat e shiut, në shpërndarjen e sëmundjeve, si dhe në qarkullimin e elementeve jetike në natyrë.
“Retë nuk janë vetëm ujë dhe avull. Ato janë habitate të gjalla që udhëtojnë mbi kokat tona çdo ditë”, shprehet aerobiologu Pierre Amato, një nga studiuesit kryesorë në këtë fushë.
Zbulimet hapin një fushë të re kërkimi mbi mënyrën se si ky “ekosistem i padukshëm ajror” mund të ndikojë në klimën globale dhe në jetën e përditshme të njerëzve.
