Tre vëllezër nga Skocia, Jamie, Ewan dhe Lachlan Maclean, kanë vendosur një rekord botëror duke përfunduar udhëtimin e tyre të jashtëzakonshëm në Oqeanin Paqësor pa ndihmën e ndonjë anijeje mbështetëse. Pas 139 ditësh në det, ata mbërritën të shtunën në Cairns, Australi, duke përshkuar një distancë prej më shumë se 14.4 mijë kilometrash detare dhe duke u bërë ekipi i parë që realizon këtë kalim të plotë nga Amerika e Jugut deri në Australi. Gjatë këtij udhëtimi të gjatë dhe të vështirë, vëllezërit përballuan stuhi të forta, sëmundje dhe dëmtime, përfshirë edhe një moment dramatik kur Lachlan u mor nga dallgët e detit. Përveç sfidave fizike, ata arritën të mbledhin mbi 946 mijë dollarë si pjesë e objektivit të tyre për të grumbulluar 1 milion paundë për një projekt që synon furnizimin me ujë të pastër.
Në momentin e mbërritjes në Australi, vëllezërit valëvitën flamurin skocez, australian dhe britanik, dhe u pritën nga mbi 50 anëtarë të familjes së tyre, përfshirë nënën, si dhe nga mbështetës të shumtë. Pak orë para mbërritjes, Ewan, vëllai më i madh, publikoi një video ku i drejtohej marinës australiane me një shaka: “Keni pica dhe birra? Përsëris, keni pica dhe birra? Po mbaroj.”
Ewan, 33 vjeç, e përshkroi aventurën si përvojën më të vështirë të jetës së tij, duke theksuar se nuk do ta kishte përballuar kurrë pa praninë e vëllezërve të tij. Jamie, 31 vjeç, shtoi se në përfundim të udhëtimit gjithçka dukej si një sfidë e pamundur që u realizua me sukses.
Tre vëllezërit synojnë të vazhdojnë mbledhjen e fondeve përmes fondacionit të tyre, Maclean Foundation, me qëllim financimin e projekteve që do të sigurojnë ujë të pastër për rreth 40 mijë banorë në Madagaskar. Rekordi i mëparshëm mbahej nga eksploruesi rus Fyodor Konyukhov, i cili kishte kaluar Oqeanin Paqësor i vetëm në vitin 2014 për 160 ditë.
