SPAK ka zbardhur lidhjet mes kryebashkiakut të Tiranës, Erion Veliaj, dhe një prej biznesmenëve më të njohur në vend, Gentjan Sula, pronari i kompanisë Agi Kons dhe i zonës rezidenciale “Kodra e Diellit”, ku jetojnë politikanë dhe biznesmenë.
Sipas hetimeve, njohja mes Veliajt dhe Sulës daton që prej vitit 2004, kur të dy kanë udhëtuar me charter jashtë vendit. Udhëtimi i 13 gushtit 2004 nuk ka qenë i vetmi për ta, pasi Veliaj dhe Sula kanë udhëtuar sërish në vitin 2016 me charter dhe në 2017 nga Rinasi drejt Stambollit me linjën ajrore Turkish Airlines.
Nga të dhënat e siguruara prej SPAK-ut, kompania Agi Kons ka përfituar gjithsej 10 tendera. Në këmbim, biznesmeni Gentjan Sula dyshohet se ka dhuruar një vilë në kompleksin Marea në Qerret për çiftin Veliaj-Xoxa.
Megjithëse Ajola Xoxa dhe Erion Veliaj kanë mohuar se vila është në pronësinë e tyre, hetimet kanë zbuluar të kundërtën. Sipas prokurorëve, jo vetëm që celularët e tyre janë loguar për një kohë të gjatë në atë zonë, por edhe persona të afërt me ta i kanë tradhtuar me dëshmitë e tyre.
Armand Manahasa, shoferi personal i Xoxës, ka dëshmuar se ka shoqëruar bashkëshorten e kryebashkiakut në një vilë brenda kompleksit Marea në Qerret.
Maksim Greva, administratori i resortit, ka pohuar se Ajola Xoxa shkonte shpesh në resort.
Driant Zeneli, ish-drejtor ekzekutiv i qendrës Harabel, ka pranuar se Ajola Xoxa zotëronte një vilë në kompleksin Marea.
Bazuar në këto prova, SPAK ka konfirmuar se vila në fjalë është në pronësi të çiftit Veliaj-Xoxa. Aktualisht, Ajola Xoxa ndodhet në arrest shtëpie, ndërsa Erion Veliaj është në burg. Ata dyshohen për krijimin e një skeme korruptive dhe pastrim parash.
Hetimet tregojnë se Veliaj u ka dhënë leje ndërtimi dhe tendera pesë biznesmenëve të besuar, mes tyre Gentjan Sula dhe Shkëlqim Fusha, të cilët më pas financonin aktivitetet e kompanive të bashkëshortes së tij, Ajola Xoxa.
