Një tjetër vakancë pritet të zëvendësohet në Gjykatën Kushtetuese. Pas Elsa Toskës dhe Holta Zaçajt, më 25 prill të këtij viti mbaron dhe mandati i gjyqtares Sonila Bejtja. Kjo e fundit zëvendësoi Besnik Muçin, i cili qëndroi në detyrë vetëm 1 muaj pasi u shkarkua nga vetingu. Ndërsa vetë Muçi plotësoi vakancën e Sokol Berberit.
Data e mbarimit të mandatit të Sokol Berberit është shpallur nga Presidenti Ilir Meta më 25 prill 2016, çka automatikisht e bën mandatin 9-vjeçar të përfundojë më 25 prill të këtij viti.
Por, siç ka ndodhur me mandatin e Elsa Toskës (së dorëhequr) dhe Holta Zaçajt, që vetëm pas presionit arriti të mbledhte trupën për të shpallur sipas Kushtetutës përfundimin e mandatit të saj, ngjashëm Gjykata Kushtetuese po shkel rregulloren e saj, por mbi të gjitha ligjin për shpalljen e vakancës së anëtares Sonila Bejtja.
Ligji e thotë qartë se Kryetari i Gjykatës Kushtetuese, jo më vonë se 3 muaj përpara përfundimit të mandatit të një gjyqtari të Gjykatës Kushtetuese, njofton organin e emërtesës për vendin vakant. Gjë që, si me rastin e Zaçajt dhe të Bejtes, nuk ka ndodhur. Nesër data shënon 24 dhe është afati i fundit ligjor që kryetarja e Gjykatës Kushtetuese, në detyrë, ka për të mbledhur trupën gjyqësore dhe për të shpallur dearimin e pérfundimit të mandatit për Sonila Bejten. Për sa kohë nuk ka një njoftim zyrtar për këtë mbledhje, mbetet e paqartë se kur do të mblidhet Gjykata Kushtetuese për të shpallur vakancën e Sonila Bejtjes. A do të zvarrisë zonja Zaçaj procesin, siç bëri me mandatin e saj? A do të shprehet Presidenti i Republikës (duke ndjekur precedentët e Gjykatës së Lartë) për të kërkuar nga Gjykata Kushtetuese të shpallë vakancën për emërimin që është kompetencë e tij?
Këto të gjitha janë pikëpyetje që presin përgjigje në ditët në vazhdim. Nëse në rastin e zgjatjes së mandatit të Elsa Toskës me “bekimin” e Elisa Spiropalit çështja ka mbetur ende pezull, në rastin e Holta Zaçajt, me gjithë mekanizmat ekstra ligjorë që ajo përdori, në fund u detyrua të “dorëzohej” dhe të shpallte vakancën.
