Në apartamentin 11/4 në Sky Tower, që sipas SPAK dyshohet se përdorej nga Ajola Xoxa, bashkëshortja e kryetarit të Bashkisë së Tiranës, Erion Veliaj, gjatë kontrollit të ushtruar me vendim gjykate, është gjetur një kasafortë. Për shkak se çelësi nuk ishte i disponueshëm, agjentët e BKH-së kanë kërkuar ndihmën e një eksperti, i cili e ka hapur kasafortën me një frezë.
Përmbajtja e kasafortës nuk dihet me saktësi, përveçse nga dy prokurorët e posaçëm, Altin Dumani dhe Ols Dado. Sipas burimeve, nga apartamenti "sekret" janë marrë dokumente, kontrata dhe fatura të ndryshme, ndërsa janë sekuestruar edhe rroba. Kontrollet po kryhen në kuadër të hetimit që po zhvillohet ndaj kryebashkiakut dhe familjarëve të tij për dyshime mbi korrupsion, pastrim parash dhe fshehje pasurie.
SPAK ka ushtruar më herët kontrolle edhe në kompanitë e familjarëve të Veliajt, duke sekuestruar gjithashtu telefonat e tyre.
