Kuvendi mblidhet sot në seancën e fundit plenare përpara zgjedhjeve parlamentare të 11 majit, e cila pritet të nisë në orën 10:00. Në këtë seancë, do të diskutohet dhe miratohet projektligji për krijimin e Bankës së Zhvillimit.
Gjithashtu, deputetët do të votojnë për disa projektvendime, përfshirë emërimet në Këshillin Drejtues të Radio Televizionit Shqiptar (RTSH). Komisioni për Edukimin dhe Mjetet e Informimit Publik ka përzgjedhur si kandidatë për kryetar të këtij këshilli Helion Halitin dhe Fatjon Hoxhallin, të cilët do të kalojnë sot për votim.
Seanca do të përfshijë gjithashtu miratimin e disa emërimeve në Bordin e Institutit të Studimeve për Krimet dhe Pasojat e Komunizmit. Kandidatët e propozuar janë Laureta Roshi, Etleva Smaçi, Mentor Beqa, Alma Mirakaj, Simon Mirakaj dhe Niuton Mulleti.
Ky është takimi i fundit parlamentar përpara zgjedhjeve të ardhshme, ku pritet të miratohen vendime të rëndësishme për institucionet kryesore të vendit.
