Sali Berisha dhe kupola drejtuese e PD ishin sot në qendër të protestës që opozita organizoi për të kundërshtuar mbylljen e TikTok. Të rinj të Forumit Rinor të kësaj partie mbajtën fjalime në një podium të improvizuar para Kryeministrisë, duke kundërshtuar vendimin e qeverisë për mbylljen e TikTok për një periudhë njëvjeçare.
Sali Berisha nuk mbajti fjalim gjatë protestës, por në fund të saj ai foli për gazetarët. Në përgjigje të pyetjes për mbylljen e Zërit të Amerikës, ai tha se kjo është një çështje që lidhet me gjeopolitikën globale dhe kufizimet e shpenzimeve për të shmangur propagandën, që Departamenti i Shtetit e cilëson të tepruar. “Nesër mund të vendoset të mbyllet televizioni shtetëror, por në qoftë se televizionet private kanë të gjithë hapësirën, shqiptarët nuk pësojnë asnjë censurë. Mund të them se mbyllja e Zërit të Amerikës është një akt anti-censurë” - tha kryetari i PD, i cili e cilësoi protestën e sotme si një fitore të të rinjve mbi censurën e qeverisë.
