Deputeti i Partisë Demokratike, Agron Gjekmarkaj, në një intervistë për “Kjo Javë” në News24 ka folur për listat e PD, i cili tha se janë përfaqësuese dhe gërshetojnë historinë me të ardhmen e PD.
Nuk dihet se ku e bazon mendimin Gjekmarkaj kur thotë se listat janë “përfaqësuese”, pasi në listën e sigurt jo vetëm nuk janë futur emra që u votuan nga demokratët, por në shumicën e qarqeve janë po të njëjtët emra që në PD militojnë prej 30 vitesh.
Megjithatë, Gjekmarkaj tha se është pak i surprizuar për mungesën e emrit të Salianjit në listën e PD.
“Surpriza më e madhe për mua është mungesa e Salianjit i cili është marrë peng nga padrejtësia, pushteti dhe mbahet në burgun e Fierit ku duhet të ishte si drejtues politik në qarkun e Elbasanit si aset i PD” – u shpreh ai.
Mesa duket Gjekmarkaj ka pritur që me Salianjin të zbatohej i njëjti standart si me kreun e PL, Ilir Meta, i cili edhe pse është në qeli, u fut si kandidat në listën e hapur të PD.
Deputeti demokrat gjithashtu tha se kishte pritshmëri që edhe Jorida Tabaku të ishte në listën e mbyllur, por që sipas tij edhe pse është një personalitet në PD, është sakrifikuar nga Berisha për vendet e aleatëve.
“Tabaku është një personalitet i PD, zonjë intelektuale, përfaqësuese dinake e Tiranës. Përllogaritjet që ka bërë lideri i PD në raport me aleatët e ka bërë të vështirë listën e mbyllur, kur për mua Tabaku e meritonte të ishte, por ajo nuk i trembet sfidave" - tha më tej Gjekmarkaj.
