Deputeti i Partisë Demokratike, Gjin Gjoni, deklaroi në një lidhje direkte për emisionin “Off the Record” me Andrea Dangllin në A2CNN se opozita duhet të ndërmarrë hapa më të fortë politikë, përfshirë ngujimin në Parlament apo grevën e urisë, për të kundërshtuar deformimet zgjedhore dhe mungesën e respektit ndaj rregullave parlamentare.
“Elementët që janë konstatuar në raportin e OSBE/ODIHR duhet të sanksionohen menjëherë,” tha Gjoni, duke theksuar se mazhoranca refuzon çdo konsensus për ndryshimet e kërkuara nga opozita. Sipas tij, heqja e koalicioneve parazgjedhore ka krijuar një “defekt të madh” në përfaqësimin e opozitës dhe ka sjellë humbje mandatesh për PD-në.
“Partia Demokratike duhet të radikalizohet. Parlamenti nuk mund të vazhdojë të jetë fasadë. Qytetarët nuk janë të kënaqur dhe presin veprime konkrete nga ne,” deklaroi ai.
Duke folur për format e mundshme të radikalizimit, Gjoni tha se ato duhet të jenë “të mirëkalkuluara dhe me sukses të garantuar”.
“Kur flas për radikalizim, mendoj për ngujimin në Parlament. Një tjetër mundësi është greva e urisë, por këto hapa duhen bërë me kujdes. Deputetët duhet të sakrifikojnë për t’i dhënë energji të re qytetarëve,” u shpreh ai.
Deputeti kritikoi gjithashtu mënyrën se si mazhoranca ka trajtuar çështjet e debatueshme në Kuvend, duke përmendur rastin e projektligjit për barazinë gjinore që, sipas tij, “u shty deri në orën 3 të mëngjesit dhe u kalua në votim pa debat.”
“Ky parlament nuk është normal. Nuk respektohet as Kushtetuta dhe as rregullorja,” përfundoi Gjoni.
