Drejtuesi i partisë “Mundësia”, Agron Shehaj, ka deklaruar se sipas sondazheve të kryera nga forca e tij politike, pritet të sigurojnë 7 mandate në zgjedhjet parlamentare të 11 majit.
Gjatë një interviste në emisionin “Opinion”, Shehaj u shpreh se qëllimi i tij është ambicioz, por i arritshëm, duke theksuar se ka zgjedhur rrugën më të vështirë duke mos u bashkuar me partitë e mëdha. “Sondazhet që ne bëjmë na nxjerrin me 7 mandate. Kjo nuk do të thotë që nuk duhet të punojmë. E lehtë është të bashkohesh me partitë e mëdha, por unë nuk kam marrë asnjë gjë të lehtë,” u shpreh ai.
Shehaj gjithashtu bëri të ditur se ka refuzuar një ofertë nga Partia Demokratike për t’iu bashkuar koalicionit “Aleanca për Shqipërinë Madhështore”. Sipas tij, propozimi iu bë vetëm dy orë para përfundimit të afatit për dorëzimin e koalicioneve në KQZ, por ai nuk kishte ndërmend ta pranonte as nëse do t’i ishte ofruar më herët.
