Adriatik Lapaj dhe Pano Soko kanë vendosur të bëjnë revolucionin zgjedhor me një formulë të re: prindërit! Në një deklaratë të fundit, dy politikanët e rinj shpjeguan se listat e mbyllura, të cilat ata i cilësojnë si mjetet e kontrollit të vjetër politik, do të “shkarkohen” duke futur në to… prindërit e tyre.
“E kemi bërë për t’i treguar Berishës dhe Ramës që ne listat e mbyllura do t’i zbrazim,” – tha Soko, duke shtuar se “gjyshi im është për Berishën.”
Lapaj nga ana tjetër, qetësoi qytetarët se vendet e tyre në lista nuk do të jenë për të kapur ndonjë mandat për familjarët, por për të garantuar se askush nuk do të përfitojë nga sistemi i vjetër.
“Të gjithë ne do të garojmë në gjithë Shqipërinë vetëm me lista të hapura, që do të thotë garë, jo vende të rezervuara nga kryetari. Por ligji i mbajtur peng nga kryetarët e vjetër parashikon si detyrim që të bëhen një herë listat e mbyllura, pastaj të kalojnë tek të hapurat. Për këtë arsye, për t’i djegur këto lista, me vullnet të plotë të atyre që janë aty, që janë prindërit tanë, ne kemi vendosur të garojmë me lista të hapura dhe prindërit tanë do jenë garantët për të zhbërë kapjen e sistemit nga politika e vjetër.” tha Lapaj
Me këtë logjikë revolucionare, lind pyetja: kush do të numërojë votat? A do të certifikojë fitoren e partisë së re një mbledhje familjare? Dhe mbi të gjitha, nëse këta prindër bëhen deputetë, kush do i bindë të dorëzojnë mandatin?
