Deputeti socialist, Petro Koçi, ka sulmuar ashpër ish-kryeministrin Sali Berisha, duke e cilësuar atë si një figurë të patrajnueshme në politikë. Në një deklaratë për mediat, Koçi u shpreh se trajneri i opozitës, Corey LaCivita, do ta ketë të pamundur ta ndryshojë Berishën.
“I patrajnueshëm, ky është Sali Berisha. I ziu LaCivita çfarë do të heqë për ta trajnuar këtë njeri të patrajnueshëm. Nuk kishte zgjidhje më të mirë sesa Sali Berisha për ta copëtuar PD-në dhe për t’i garantuar mazhorancës një arsye më shumë për të fituar,” tha Koçi.
Ai e cilësoi kryeministrin Edi Rama si një lider që sjell ndryshim, ndërsa Berishën si një figurë që pengon përparimin.
“Rama është maniak i ndryshimit, Sali Berisha është maniak i prapakthimit. Prandaj shqiptarët do të votojnë me shumicë PS-në dhe do t’i japin dërmën kësaj opozite,” u shpreh deputeti socialist.
Në fjalën e tij, Koçi kritikoi edhe listat e hapura në nivel rajonal, duke i quajtur një rrezik për politikën dhe demokracinë.
“Lista e hapur në nivel rajonal do të kthehet në varrin moral të politikës. Nuk duhet ta kishit bërë. Uroj që parlamenti i ardhshëm ta ndryshojë këtë ligj. Nëse do të lihen lista të hapura, të jenë në nivel kombëtar dhe zgjedhësi të votojë për më shumë se një kandidat. Lista e hapur në nivel rajonal do të jetë jo vetëm një dritare, por një derë për krimin e organizuar,” deklaroi ai.
