Nëse menduat se politika shqiptare ka një vijë të qartë ideologjike, e keni gabim. Disa nga ish-kritikët më të ashpër të qeverisë socialiste tani po garojnë pikërisht nën siglën e saj, duke na kujtuar se parimet dhe idealet vlejnë më pak se një karrige e sigurt.
Alban Zeneli, dikur zë i fortë i PD-së në Kukës, tani është gati të kërkojë votën si kandidat i PS-së, duke na treguar se në politikë nuk ka rëndësi me kë je grindur dje, por kush të ofron një post sot.
Blendi Sulaj, pas 7 vitesh si nënkryetar i Partisë Republikane dhe më pas mbështetës i Bashës, tani është gati të luftojë për vota si kandidat i PS-së. Një rrugëtim politik që më shumë se besnikëri ndaj ideve, tregon besnikëri ndaj pushtetit.
Endrit Brahimllari, ish-sekretar i LSI-së dhe pjesëmarrës i zjarrtë në protestat kundër qeverisë, ka ndryshuar mendje (apo thjesht ekip) dhe tani kërkon votën nën logon e PS-së. Dikur thërriste “Rama ik”, tani është gati të thotë “Rama më voto”.
Halit Valteri? Një politikan i cili nuk e di as vetë ku bën pjesë. Nga PD, tek aleanca me LSI-në, tek mbështetja për çdo forcë që i jep një vend në listë. Sot, kandidate nën siglën e PS-së.
Zamira Sina e cila ka qenë një aktiviste e PD që spikati në çadrën në Bulevard në vitin 2017. Ajo gjithashtu ka kandiduar për Këshillin Kombëtar të PD në vitin 2018. Zamira Sina sot u prezantua nga drejtuesi politik i PS, Bledi Çuçi si kandidate për deputete në listën e hapur të Vlorës.
Këta janë disa nga emrat që kërkojnë votën tuaj më 11 maj. Jo për ide, jo për vizion, por thjesht për të siguruar një karrige. Për ata, s’ka rëndësi nëse dje ishin kundër PS-së dhe e quanin qeverinë të korruptuar, sot janë të gatshëm ta mbrojnë po atë qeveri me po aq zell. Në politikën shqiptare, vetëm një gjë është konstante: posti mbi parimet.
