Kryeministri Edi Rama ka ironizuar listën e kandidatëve të Partisë Demokratike për Tiranën, duke e cilësuar atë si “skuadra VIP e kënetës”. Në një deklaratë për mediat, Rama tha se i vetmi që e meritonte të ishte pjesë e saj ishte Kujtim Gjuzi, por sipas tij, ai po “keqpërdoret brutalisht”.
“Kush kishte ndonjë dyshim apo ndonjë shpresë të mbetur, mjafton të shikojë skuadrën në listën e mbyllur të kryeqytetit. Është tribuna VIP e kënetës, ku mungon Kujtim Gjuzi, i cili po keqpërdoret në mënyrë brutale. Ai ishte i vetmi që do të kishte merituar të ishte në skuadrën e mbyllur për atë nivel që ka këneta,” tha Rama.
Ndërkohë, ai ironizoi edhe ish-deputetin demokrat Dashnor Sula, duke e quajtur “gjeli i detit i Peqinit” dhe duke shtuar se ai nuk e përballoi dot trajtimin që i bëri partia e tij.
“I madhi Dash Sula, që nuk ka lënë gjë pa bërë, u la në det të hapur dhe mesa mora vesh, u arratis se nuk e përballoi dot këtë poshtërim që i bëri këneta. Është një figurë me personalitet të veçantë, por që nuk pajtohet me ta,” vijoi Rama.
