Që kryetarja e Kuvendit është shndërruar në një personazh qesharak me protagonizmin e saj të pavend personal, nuk është më lajm. Por që zyra e shtypit të Parlamentit të Shqipërisë të ndajë për median njoftimin se Kryegjyshi Bektashi, Baba Mondi, i ka uruar ditëlindjen Elisa Spiropalit me një tortë, kjo po që është një lajm i rrallë për një vend demokratik.
I tillë është edhe rasti i sotshëm, ku Elisa Spiropali ka marrë pjesë në iftarin e shtruar nga kreu i Bektashinjve, Haxhi Dede Baba Edmond Brahimaj. Gjatë kësaj darke iftari, Baba Mondi i ka bërë Spiropalit një surprizë me një tortë të madhe për ditëlindje.
Që darkat e iftareve janë shndërruar prej vitesh në platforma propagande për politikën shqiptare, kjo është një tjetër çështje që meriton diskutim. Por që Parlamenti i Shqipërisë të shndërrohet në zëdhënës të tortave-surprizë për Spiropalin, është turp për ata që e shkruajnë dhe e trajtojnë seriozisht një absurditet të tillë.
