Edhe pse është përditë me intervista apo kronika lajmesh tek ta, kreu i Partisë Demokratike, Sali Berisha, është sërish i pakënaqur me mediat kryesore në vend. Në fjalimin e tij para mbështetësve poshtë ballkonit, Berisha tha se opozita po censurohet nga mediat, që sipas tij i shërbejnë qeverisë si instrumenta të kontrolluar për të mbrojtur interesat e pushtetit.
“Mediat kombëtare private dhe publike, se tani nuk i njeh më se çfarë janë, nga mëngjesi gjer në darkë janë shndërruar në altoparlantë të qeverisë, në institucione të dezinformimit masiv. I ndiqni ekranet e tyre, e kanë me borxh të japin edhe teshtimat e Edi Ramës, të japin çdo jaht që vjen dhe mbushet më 500 mijë litra naftë me 1/3 e çmimit në portet tona, dhe u bëka reklamë, paçka se supermiliarderët vijnë dhe nxjerrin udhëtimet falas pa pare, duke blerë naftën 4 herë më lirë se shqiptarët. Kurse mediat e censurës kombëtare, mediat e lustrës kombëtare, nuk arrijnë kurrë t’u thonë shqiptarëve të vërtetat e tyre. Nuk flasin njëherë për pensionistët” – tha ndër të tjera Berisha.
Berisha më tej shtoi se Shqipëria është përballur me një shtrirje të paprecedentë të ndikimit të qeverisë në media, ku sipas tij, janë ndjekur penalisht dhe burgosur liderët e opozitës, por kjo nuk raportohet. Ai tha se nuk dallon dot kush është RTSH, kush është Top Channel, Klan apo Vizion Plus. Të gjitha në garë kush e kush më parë t’i lëpihet qeverisë, të mashtrojë qytetarin.
“Ktheni kokën kur dëgjoni lajmet e tyre sepse janë megafonë mashtrimi të Edi Ramës. T’i lëmë në hapësirën e mashtrimit dhe të dezinformimit mediat e kontrolluara nga Edi Rama, të cilat i lënë opozitës më pak se 10% dhe dërdëllisin gjithë ditën për Edi Ramën. Të cilat përpiqen me çdo kusht të zbukurojnë me çdo kusht narkodiktaturën. Përpiqen me çdo kusht të mbrojnë kriminelët e pushtetit.
Përpiqen me çdo kusht të paraqesin Shqipërinë si një vend normal, paçka se sot Shqipëria si asnjë vend tjetër në Europë ka të burgosur, në ndjekje penale liderë të tre partive kryesore opozitare, dhe sipas tyre kjo nuk është diktaturë. O servilë, historia do u dënojë për mashtrimin që u bëni shqiptarëve. Nuk ka si në Shqipëri, nuk dallon dot kush është RTSH, kush është Top Channel, Klan apo Vizion Plus. Të gjitha në garë kush e kush më parë t’i lëpihet qeverisë, të mashtrojë qytetarin. Cila e cila më shumë të censurojë opozitën, të demonizojë opozitën, të mashtrojë për opozitën” – tha Berisha që u kërkoi mbështetësve të tij që lajmet t’i marrin në rrjetet sociale..
