Kryeministri në detyrë i Kosovës, Albin Kurti, ka deklaruar se institucionet e Kosovës janë në komunikim të vazhdueshëm me Misionin e NATO-s në Kosovë, KFOR, lidhur me çështjen e hapjes së urës kryesore mbi lumin Ibër në Mitrovicë për qarkullimin e automjeteve.
Gjatë një konference për media, ku u prezantua një projekt për banimin social, Kurti bëri të ditur se do të zhvillonte një takim me komandantin e KFOR-it, gjeneralmajor Ozkan Ulutas, ku pritet të diskutohet edhe çështja e urës së Ibrit.
“Për marrjen nën kontroll të urës, jemi në komunikim me KFOR-in. Sot pasdite kam edhe një takim me Ulutas në Kryeministri. Pra, jemi në komunikim të përditshëm, qoftë Kryeministria, qoftë Ministria e Brendshme”, deklaroi Kurti.
Kreu i qeverisë në detyrë tha se, pas ndërtimit të urave të reja mbi Ibër, nuk ka më arsye që ura kryesore të vijojë të mbahet e mbyllur për automjetet.
“Pas ndërtimit të urave të reja, është bërë absurde që ajo urë të mbahet e mbyllur. Fakti që qytetarët kanë qarkulluar lirshëm nëpër këto ura të reja dhe nuk ka pasur shtim as të incidenteve dhe as të tensioneve, tregon se qarkullimi i njerëzve dhe mallrave është i dobishëm jo vetëm për ekonominë, por edhe për paqen dhe sigurinë”, theksoi Kurti.
Deklaratat e Kurtit vijnë pak ditë pasi KFOR-i njoftoi se ka nisur tërheqjen graduale të pranisë së përhershme mbi Urën e Ibrit në Mitrovicë. Sipas misionit të NATO-s, ky proces po zhvillohet në përputhje me përmirësimin e situatës së sigurisë në Kosovë dhe është pjesë e optimizimit të pozicionimit të forcave të KFOR-it.
