Presidenti i Serbisë, Aleksandar Vuçiç, ka paralajmëruar se do t’i drejtohet me letër Sekretarit të Përgjithshëm të NATO-s, Mark Rutte, lidhur me çështjen e hapjes së urës kryesore mbi lumin Ibër në Mitrovicë.
Vuçiç ka kundërshtuar hapjen e urës për automjete, duke pretenduar se vendimet po merren pa konsultimin e kryetarit të Mitrovicës së Veriut, Milan Radojeviç. Ai ka kritikuar gjithashtu komandantin e KFOR-it dhe ka thënë se pret që Rutte ta shqyrtojë kërkesën e tij.
“Do t’i shkruaj Mark Ruttes sot. Shpresoj se do të më përgjigjet dhe do ta pranojë kërkesën time që të mos e bëjë këtë”, deklaroi Vuçiq.
Ndërkohë, Komisioni Evropian ka kërkuar koordinim efektiv dhe konsultime kuptimplota mes komunave të prekura dhe institucioneve qendrore të Kosovës për hapjen e urës për automjete.
Ura kryesore mbi Ibër, e cila lidh Mitrovicën e Jugut me atë të Veriut, ka qenë prej vitesh një nga pikat më të ndjeshme të tensioneve mes komuniteteve shqiptare dhe serbe në Kosovë.
