Policia e Kosovës ka zbuluar dhe sekuestruar një arsenal të madh armësh gjatë kontrolleve të zhvilluara në 12 lokacione të ndryshme në veri të vendit.
Drejtori i Përgjithshëm i Policisë së Kosovës, Gazmend Hoxha, bëri të ditur se gjatë operacionit janë gjetur gjithsej 72 armë, mes tyre mitralozë, automatikë AK-47, armë të gjata, pistoleta dhe pushkë gjuetie. Gjithashtu janë sekuestruar granata dore, mijëra fishekë, pjesë armësh, pajisje ushtarake, si dhe uniforma të ushtrisë dhe policisë serbe.
“Janë gjetur 72 armë, prej tyre: 2 mitralozë, 11 AK-47, 22 armë të gjata të llojeve të ndryshme, 27 pushkë gjuetie, 9 pistoleta, 1 pushkë ajrore, 7 granata dore, 4831 copë municione, janë gjetur dhe pjesë të armëve, shumë pajisje të tjera ushtarake si dhe uniforma të ushtrisë dhe policisë së Serbisë”, deklaroi Hoxha.
Ministri i Brendshëm në detyrë, Xhelal Sveçla, drejtoi akuza ndaj Serbisë, duke pretenduar se përmes tensioneve në veri është synuar edhe pengimi i zbardhjes së fatit të personave të zhdukur gjatë luftës dhe i krimeve të kryera në Kosovë. Ai iu referua edhe varrezës masive të zbuluar në Zubin Potok.
“Është shqetësuese heshtja e Serbisë dhe dorës së zgjatur të saj në Kosovë për këto zhvillime, pra për varrezën masive dhe armët e konfiskuara. Heshtja e Serbisë është mbështetje e hapur për planifikuesit, organizatorët dhe realizuesit e tyre”, tha Sveçla.
Autoritetet po hetojnë gjithashtu nëse një pjesë e armëve të sekuestruara mund të jenë përdorur në vrasjen e një grupi intelektualësh në Mitrovicë. Hoxha theksoi se bëhet fjalë ende për dyshime, të cilat duhet të verifikohen përmes ekspertizave laboratorike.
“Këto janë dyshimet tona që pjesë të këtyre armëve mund të kenë qenë të përfshira edhe në rastin e vrasjes masive të grupit të intelektualëve, por kjo mbetet të verifikohet nga laboratorët e Kosovës, e nëse ka nevojë, edhe jashtë”, deklaroi ai.
Sveçla u zotua se hetimet do të zhvillohen me urgjencë dhe se autoritetet do të vijojnë punën për identifikimin dhe vënien para drejtësisë të personave përgjegjës për krimet e luftës.
Autoritetet e Kosovës përsëritën gjithashtu akuzat ndaj Serbisë se po pengon zbardhjen e fatit të personave të zhdukur gjatë luftës, përfshirë përmes klasifikimit të dokumenteve të caktuara si sekret shtetëror.
