Nga Desada Metaj
Nëse mbështetësit e partive të reja sillen si patronazhistët e Ramës apo si linçuesit online të Berishës, atëherë është e kotë të ndalemi për të lexuar programet e Adriatikut, Shehajt apo Qorit.
Çfarëdo lloj programi të kenë shkruar në letër, nëse një parti e re nuk arrin të sjellë një frymë të re dhe të ndërtojë një mentalitet ndryshe nga ai i linçimeve që dominojnë në dy partitë e mëdha, atëherë çdo përpjekje është e kotë. Sjellja e mbështetësve reflekton modelin e liderit, dhe deri më tani kjo nuk jep shenja pozitive për ndryshim.
Kur kritikon Lapajn, dhjetëra ndjekës të tij të turren për të të sulmuar. Nëse nuk je dakord me idenë e Shehajt për TV publik, nga “call center”-i i tij të zbulojnë deri biografinë e gjyshes. Për të mos folur për bandën online të Arlind Qorit…
Nëse këta liderë të partive të reja pretendojnë të kenë një vend në parlament, së pari duhet të fitojnë respektin e një shoqërie të lodhur nga sherrnaja pa thelb. Sjelljet agresive, mungesa e etikës dhe sponsorizimet për denigrime online janë modele që duhet të ndryshohen urgjentisht. Nëse nuk e bëjnë këtë, të paktën duhet të distancohen nga këto praktika për të ofruar diçka ndryshe – diçka që njerëzit e zakonshëm, ata të lodhur nga politika tradicionale, presin nga të rinjtë në politikë.
Nëse duan të bëjnë realisht diçka ndryshe, liderët e partive të reja duhet të kërkojnë mbështetjen e asaj pjese të shqiptarëve që ende mendojnë përtej ndikimeve të Ramës apo Berishës. Madje edhe nëse mendojnë gabim, të paktën kanë një mendim të pavarur. Për të fituar mbështetjen e të pavendosurve, nuk mund të imitojnë agresivitetin e pasuesve të Saliut apo linçimet e organizuara të ndjekësve të Ramës.
Askush nga qytetarët e zakonshëm nuk ka kohë të lexojë programet e partive të reja. Gjykimi për to vjen nga mënyra si liderët e tyre qasen në media dhe përballjet publike. Përballjet në rrjetet sociale duhet të jenë një mundësi për të treguar ndryshimin mes tyre dhe dy partive kryesore, PS dhe PD.
Deri tani, për çdo kritikë ndaj Agron Shehajt, në çast shfaqen profile false që sulmojnë këdo që mendon ndryshe nga lideri i tyre. E njëjta gjë ndodh edhe me liderët e tjerë, të cilët, ndonëse nuk kanë të njëjtin akses apo financime për trollat online, ndjekin të njëjtën logjikë.
Të nderuar liderë të partive të vogla, mos e merrni kritikën si sulm. Përkundrazi, ajo tregon që publiku ju konsideron. Korrigjojini qëndrimet, distancohuni nga linçimet e mbështetësve tuaj dhe ofroni një shpresë reale. Publiku nuk pret nga ju të përsëritni modelet e vjetra, por të provoni që mund të jeni ndryshe. Vetëm përmes pranimit të kritikës dhe hapjes ndaj mendimeve të ndryshme mund të projektoni një të ardhme më të mirë në një vend të mbytur nga propaganda. Kritikët nuk janë armiqtë tuaj – shihni brenda vetes dhe kuptoni që liria për të menduar ndryshe është themeli i çdo projekti serioz për ndryshim.
