Në fushatën elektorale që sapo ka nisur, Sali Berisha ka ngritur akuza të ashpra ndaj kandidatëve për deputetë të kryeministrit Edi Rama, duke i etiketuar si figura me dosje të rënda në SPAK, të përfshirë në afera korruptive dhe me lidhje të thella me krimin.
“Grupi i parë i listës së Edi Ramës janë që të gjithë pa përjashtim me dosje të rënda SPAK-u, aferash korruptive ndër më të mëdhatë dhe lidhje me krimin ndër më të tmerrshme. Simbol i kësaj liste, përveç Edi Ramës vetë, është Taulant Balla,” deklaroi Berisha në një bashkëbisedim me mbështetësit.
Nga ana tjetër, vetë Berisha dhe figura të rëndësishme të Partisë Demokratike, si Fatmir Mediu, Flamur Noka, Bardh Spahia dhe Belind Këlliçi, janë gjithashtu nën hetim nga SPAK. Megjithatë, kur Berisha flet për këto raste, ai përdor termin “SKAPI i partisë”, duke e cilësuar SPAK-un si të kontrolluar nga qeveria.
Retorika e Akuzave në Vend të Platformave
Ndërsa zgjedhjet afrohen, akuzat e ndërsjella me në qendër SPAK-un po dominojnë debatin publik, duke zëvendësuar diskutimin për programet dhe politikat konkrete që prekin jetën e qytetarëve. Përdorimi i SPAK-ut si një armë politike është bërë një taktikë e njohur muajt e fundit.
Nga ana e tij, Edi Rama ndryshoi strategji disa javë më parë, duke sulmuar prokurorët e SPAK-ut për llogari të çështjes Veliaj. Megjithatë, afrimi i ditës së zgjedhjeve e ka shtyrë Ramën të ndryshojë qëndrim dhe të përfitojë nga sukseset dhe lavdërimet për SPAK-un. Edhe pse shumë bashkëpunëtorë të tij janë nën hetim apo pas hekurave falë SPAK-ut, Rama ka rifilluar të pretendojë se ai është ideatori dhe njeriu që bëri të mundur ekzistencën e Prokurorisë së Posaçme.
Ndikimi Tek Elektorati
Përfshirja e SPAK-ut në këtë debat zgjedhor ka një ndikim të dyfishtë: nga njëra anë, ajo nxit elektoratin të kërkojë transparencë dhe drejtësi; nga ana tjetër, rrezikon ta shndërrojë SPAK-un në të vetmen “forcë politike” me mbështetje pa rezerva nga shqiptarët.
Rreziku më i madh qëndron në krijimin e përshtypjes se këto zgjedhje janë një garë mes figurash të diskredituara, ku politika është zhvendosur në drejtësi dhe drejtësia në politikë.
Në fund, pyetja kryesore mbetet: a do të jetë kjo fushatë një garë për ide dhe zgjidhje, apo thjesht një betejë për të shpallur fajtor kundërshtarin duke përdorur SPAK-un?
