Nga Desada Metaj
Fatmir Xhafaj ka publikuar sot një reagim të gjatë në Facebook, duke iu përgjigjur disa politikanëve, siç thotë ai, dhe medias për gjoja kontroll të zyrës, sekuestrim laptopi e dokumentesh, apo insinuatat monstruoze për lidhje me ndërhyrjen e paligjshme në postën elektronike të prokurorëve të SPAK. “Gjithçka nga këto është një thes gënjeshtrash, sajesa të ulëta të gatuara për motive qëllimkëqija, nga njerëz të paskrupullt moralisht! Unë i hedh poshtë me përbuzje dhe neveri” – shkruan Xhafaj, ndërkohë që mbetet e paqartë se kujt politikani apo cilës media i referohet deputeti i PS.
Në fakt, SPAK konfirmoi se dy ish-zyrtarë të shtetit shqiptar janë arrestuar në përpjekje për të vjedhur në mënyrë të paligjshme të dhëna nga të paktën tre kompjuterë të prokurorëve të SPAK. Mbi dy ish-zyrtarët tashmë rëndon akuza e grupit të strukturuar kriminal, dhe ajo që media ka mundur të hulumtojë ka të bëjë me faktin se Arnold Rrokaj, ish-punonjës i IMT-së, dhe Zambak Gjonaj, ish-zyrtar i burgut të Vlorës, kanë qenë emërime të ndokuara nga Fatmir Xhafaj. Materialet e marra nga Rrokaj dhe Gjonaj janë transferuar në celularin e Dritan Palnikajt, sekretar i përgjithshëm në Ministrinë e Bujqësisë. Palnikaj ka qenë më herët në Ministrinë e Brendshme dhe aktualisht është i angazhuar në fushatën e Xhafajt. Ai është pyetur nga SPAK dhe i është këqyrur telefoni.
Ky i fundit mund t’i kishte përgënjeshtruar këto dhe të sqaronte nëse janë ose jo persona të njohur për të. Por në fakt, Xhafaj vetëm sulmon median, duke pretenduar se nuk është ushtruar asnjë kontroll në zyrën e tij, pa përcaktuar se për cilën zyrë bëhet fjalë: atë në Parlament apo zyrën avokatore që ndodhet pranë godinës së njohur si ETC në Tiranë. Për më tepër, kontrollet e ushtruara kanë ditë që janë kryer, dhe në njoftimin e SPAK, në asnjë rresht nuk insinuohet për asnjë emër konkret.
Si jurist në profesion, nuk do të ishte e udhës që ai të bënte deklarata publike për një çështje që është ende në hetim dhe ku nuk dihet asgjë me siguri, as për kontrollet në zyra apo të çfarëdo lloji tjetër. Reagimi i tepruar për disa deklarata periferike ndoshta është tregues i nervozizmit të zotit Xhafaj për atë çka mund të sjellë përfundimi i hetimeve të SPAK për tentativën e vjedhjes së të dhënave nga dosjet e prokurorëve. Më mirë do të ishte që, në të tilla raste, të priste deri në përfundimin e tyre dhe më pas t’i turrej medias për hamendësimet e saj të ligjshme. Përndryshe, i konsideruar nga socialistët si “babai” i reformës dhe nga të tjerë si “kontrollori” i saj, Fatmir Xhafaj thjesht po tregohet i pakujdesshëm në një terren të rrëshqitshëm. Pikërisht në terrenin ku kanë thyer qafën politikisht shumë nga shokët e partisë së tij, mbështetës të reformës dhe vetë personalisht të Fatmir Xhafajt.
