Komisioni i Reformës Zgjedhore iu rikthye punës pas një periudhe bllokimi, me rikthimin e opozitës në tryezën e diskutimeve. Por rifillimi rezultoi jetëshkurtër, pasi Partia Socialiste dhe Partia Demokratike u përplasën për rendin e ditës, duke e mbyllur mbledhjen pa asnjë vendimmarrje konkrete.
Bashkëkryetari demokrat, Oerd Bylykbashi, akuzoi socialistët se po shmangin rekomandimet kryesore të OSBE/ODIHR-it, veçanërisht ndarjen e shtetit nga partia dhe ndalimin e përdorimit të burimeve publike në zgjedhje. Ai kërkoi gjithashtu lista 100% të hapura, përfshirë zgjedhjen e këshillave bashkiakë.
“Duam lista të hapura 100 përqind. Duhet listë e hapur 100 përqind edhe për Këshillin Bashkiak. Deri tani për propozimet tona kemi vetëm ‘Jo’”, deklaroi Bylykbashi, duke akuzuar PS-në se po pengon ndryshimet në Kodin Zgjedhor.
Nga ana tjetër, bashkëkryetari socialist Damian Gjiknuri deklaroi se mazhoranca i ka gati propozimet teknike për reformën, përfshirë administrimin e zgjedhjeve nga një administratë e paanshme. Ai u shpreh i hapur për diskutimin e ndryshimit të sistemit zgjedhor, por kërkoi që njëkohësisht të shqyrtohet edhe ulja e numrit të deputetëve.
“Nëse ne duam të ndryshojmë sistemin zgjedhor, përfshirë edhe variantin e një sistemi proporcional, duhet të adresojmë njëkohësisht dhe numrin e mandateve të deputetëve”, u shpreh Gjiknuri.
Përplasja përfundoi me largimin e përfaqësuesve demokratë dhe ndërprerjen e mbledhjes. Ndërkohë, koha për arritjen e një marrëveshjeje po ngushtohet, pasi mandati i komisionit përfundon më 30 nëntor.
