Edi Rama po i qaset protestës në forma të ndryshme, duke kaluar nga etiketimet për "armiq të jashtëm", në diferencim dhe "ledhatim" të protestuesve.
Një prej qytetarëve e ka sfiduar sot hapur kryeministrin përmes një komenti, duke i vënë në dukje se nuk janë protestuesit, por vetë qeveria ajo që dëmton imazhin e Shqipërisë.
Argumenti i qytetarit që "gozhdoi" kryeministrin
‘Në një republikë normale, protestat nuk duhen demonizuar dhe as instrumentalizuar; ato duhen dëgjuar. Qytetarët nuk kanë detyrë të jenë të dobishëm për qeverinë. Ata kanë të drejtë të kërkojnë shpjegime, transparencë dhe respekt për shqetësimet e tyre. Demokracia nuk funksionon vetëm ditën e zgjedhjeve; ajo vazhdon edhe në sheshe, në debate publike dhe në zërin e kundërshtimit qytetar.Po ashtu, është e padrejtë të ngarkohet protesta me përgjegjësinë për dëmtimin e imazhit të vendit apo të sezonit turistik. Imazhi i një shteti nuk dëmtohet nga qytetarët që ushtrojnë të drejtën kushtetuese për të protestuar, pot nga paaftësia për të dëgjuar shqetësimet e tyre dhe për të ndërtuar besim. Demokracitë më të zhvilluara në botë përjetojnë protesta të vazhdueshme dhe kjo nuk i bën ato vende më pak tërheqëse për turistët apo investitorët.
Etiketimi i mijëra protestuesve si "turmë e manipuluar", "budallenj" apo vegla të "forcave destruktive" nuk është argument politik; është përçmim ndaj qytetarëve që mendojnë ndryshe’
Ndryshimi i taktikës nga Rama: Nga sulmi te "ledhatimi"
I ndodhur në vështirësi përballë kësaj logjike të qartë komunikimi, kryeministri është detyruar të replikojë. Këtë herë, ai ka zgjedhur të lërë mënjanë fjalët fyese dhe të përdorë një taktikë tjetër: atë të diferencimit dhe zbutjes së tonit.
“Askush nuk kërkon po ashtu mbyllje të debatit publik, po dhuna online, bullizimi i njerëzve në rrugë, bllokimi i rrugës së aeroportit nuk janë debat, po mbytje e debatit.
Askush nuk i ka futur të gjithë protestuesit në një thes, po kjo protestë ka brenda mozaikut të saj nga të gjitha dhe “turmën e manipuluar” e thanë vetë protestuesit e zhgënjyer nga ikja pas berihait mbrëmë natën”
Kryeministri e ka mbyllur komentin e tij me bindjen se Partia Socialiste dhe qeveria do të nxjerrin mësime nga kjo situatë, duke shtuar se mazhoranca ka me vete të vërteta të cilat njerëzit e zakonshëm të këtij vendi i dinë shumë mirë.
