Deputetja e Partisë Socialiste, Sara Mila, ka reaguar pas dy netëve të koncertit të këngëtarit Ylli Limani në Tiranë, duke e paraqitur atmosferën e krijuar gjatë aktivitetit si shembullin e Shqipërisë që, sipas saj, po ndërtohet çdo ditë.
Në një postim në rrjetet sociale, Mila shkruan se Tirana foli “me gjuhën më të bukur: me muzikë, me emocion, me qytetari dhe me energjinë e jashtëzakonshme të të rinjve”, duke vlerësuar artistin për atmosferën e krijuar gjatë dy mbrëmjeve.
Sipas deputetes socialiste, koncerti nuk ishte thjesht një aktivitet artistik, por një pasqyrë e asaj që ajo e konsideron si Shqipërinë e së ardhmes. “Ishte një pasqyrë e qartë e asaj Shqipërie që duam dhe që po ndërtojmë çdo ditë: mikpritëse, europiane, plot jetë, plot dritë dhe plot shpresë”, shkruan Mila.
Ajo thekson se rreth 30 mijë të rinj morën pjesë në aktivitet, duke i përshkruar si brezin që mbështet “standardin, progresin, kulturën, qytetin e hapur dhe jetën normale”. Në postimin e saj, deputetja shton se këta të rinj “nuk ushqehen me zhurmë, me urrejtje apo me ndasi, por me ëndrra, talent, dashuri për qytetin dhe dëshirë për të ecur përpara”.
Por pjesa më e drejtpërdrejtë e reagimit lidhet me protestat që prej ditësh po zhvillohen në Tiranë. Edhe pse pa i përmendur nominalisht organizatorët apo protestuesit, Mila i krahason ato me atmosferën e koncertit, duke shkruar se mbrëmja ishte “shumë larg asaj çoroditjeje që kërkon të marrë njerëzit me zor në protesta, bën thirrje për bojkot të artistëve që aq shumë i duhen vendit, t’i mbajë peng në mllef dhe t’i përdorë për interesa të ngushta”.
Sipas saj, në koncert “nuk kishte detyrim, nuk kishte presion, nuk kishte urrejtje”, por vetëm “njerëz të lirë, të rinj të lumtur dhe një Tiranë që di të festojë si kryeqytet europian”.
Në përfundim, deputetja socialiste e cilëson këtë si “energjinë e re të Shqipërisë”, duke shtuar se kjo është Shqipëria “që bashkon, që buzëqesh, që mirëpret dhe që ecën përpara”.
