Kryeministri Edi Rama ka mbrojtur projektin e resortit luksoz në Zvërnec gjatë një interviste për rrjetin amerikan MS NOW, duke hedhur poshtë akuzat për konflikt interesi dhe duke u shfaqur i irrituar nga pyetjet që lidhen me Jared Kushner dhe lidhjet e tij me familjen Trump.
Gjatë bisedës me gazetaren Ines de La Cuetara, Rama u zotua se projekti do të ecë përpara, duke argumentuar se një investim i kësaj përmase do të sjellë përfitime ekonomike për vendin. Ai i cilësoi kritikat ndaj projektit si “budallallëqe ideologjike” dhe këmbënguli se negociatat për investimin kishin nisur shumë përpara se Donald Trump të rikthehej në Shtëpinë e Bardhë.
I pyetur për konfliktin e mundshëm të interesit, Rama reagoi ashpër: “Çfarë konflikt interesi? Çfarë po flet? Nuk po negocion Jared Kushner. Ai po fiton një m*t. Edhe një herë. Ju duhet ta kuptoni. Kur Jared Kushner dhe Ivanka erdhën këtu dhe ne filluam të punonim së bashku, nuk ishte e qartë nëse Trump do të shkonte në burg apo në Shtëpinë e Bardhë”.
Kryeministri sugjeroi gjithashtu se debati rreth investimit në Shqipëri po përdoret si pjesë e përplasjes politike amerikane.
“Çfarë kërkoni ju këtu? Shkoni luftoni me Trump në Shtetet e Bashkuara. Mos hajdeni këtu të luftoni me Trump. Kjo s’ka kuptim”, tha ai.
Rama mbrojti investitorët e përfshirë në projekt, duke deklaruar se ata “nuk po vijnë për të shkatërruar, por për të ndërtuar”, ndërsa ironizoi interesimin e mediave dhe aktivistëve amerikanë për çështjen e flamingove dhe zonës së mbrojtur të Nartës.
“Doni që unë të besoj se papritmas media amerikane, influencerat amerikanë, bota amerikane po kujdesen për disa flamingo në Shqipëri?”, u shpreh ai.
Në intervistë u trajtuan edhe protestat që prej ditësh po zhvillohen në Tiranë. Sipas medias amerikane, Rama përjashtoi mundësinë e dorëheqjes dhe pretendoi se shumica e shqiptarëve mbështesin projektin. Ai argumentoi se investimi do të sjellë të ardhura dhe zhvillim ekonomik për vendin.
Kryeministri deklaroi gjithashtu se nuk është i shqetësuar se debati rreth resortit në Zvërnec do të ndikojë në rrugën e Shqipërisë drejt anëtarësimit në Bashkimin Europian.
